Абруйлы «Форбс» журналы мәғлүмәттәре буйынса, былтыр Рәсәйҙә доллар иҫәбендәге миллиардерҙар һаны 77 баштан 96 башҡа еткән. Иң бай 200 рәсәйле бер йыл эсендә генә 100 миллиард долларға байыған. Эй ашайҙар, эй ашайҙар, һаман туя алмайҙар. Иң байы, «капиталистик хеҙмәт геройы» - Леонид Михельсон, шәхси байлығы 14,4 миллиардтан 18,4 миллиард долларға етте. Унан ҡала Алексей Мордашов (17,5 млрд) һәм Владимир Лисин (16,1 млрд).

Көнбайыш илдәренең рәсми хеҙмәттәре са-быйҙарса хәйләһеҙ булып та китә икән. Мәҫәлән, бер илдән икенсегә сыҡҡан кешенән анкета тултырталар, унда «Террорсылыҡ, шымсылыҡ, саботаж йә геноцид (күпләп кеше үлтереү) менән шөғөлләнергә йыйынаһығыҙмы?» - тигән һорау ҙа бар икән. Әйтерһең, ысын золомсо ҡара ниәттәрен һөйләп торасаҡ! Ә бына ипле кешеләр яңылыштан был тоҙаҡҡа эләгеп тә ҡуя. Америкаға осорға самалаған Харви Кеньон-Кэйрнс әфәнденең күҙе күрмәгәндер инде, ейәне исеменән документ тултырғанда, үрҙә әйткән һорауға «эйе» тип яуаплай. Ошо нигеҙҙә ейәненә АҠШ сиге аша үтеү тыйыла. «Террорсы» һәм «шымсы» ни бары 3 айлыҡ бәпес икәнлегенә илселек хеҙмәткәрҙәре ташлама яһамай. Аҙағынан, тауыш ҡупҡас, рөхсәт бирелеүен бирелә, әммә күп йүгерекләргә, яңынан ҡиммәтле билеттар алырға тура килә.

Диндәренә күсергә өгөтләп бәйләнгән «Иегова шаһиттары» менән барығыҙҙың да осрашҡаны барҙыр. Бигерәк әрһеҙ булып китәләр ине. Сик ҡуйылды, буғай - Рәсәй Юғары суды уларҙы экстремистик ойошма, тип таныны һәм РФ би-ләмәләрендә эшмәкәрлектәрен тыйҙы. Әммә шатланмай тороғоҙ әле - «Иегова шаһиттары» судлашырға йыйына, Евросоюз да шундуҡ уларға теләктәшлектәрен белдерергә ашыҡты.

Швейцария халҡы эт менән бесәй ите ашарға әүәҫ икән. Германия менән Австриянан айырмалы, закон менән тыйылмай - сауҙаға сығарыуға ғына сик ҡуйылған. Ҡунаҡҡа килгәндәрҙе аҫтыртын ғына ошо «аҙыҡ» менән һыйлап, «Һиҙмәнеләр!» - тип көлөүҙән мәрәкә табалар, ти. Ул яҡтарға юл төшһә, һаҡ булығыҙ. Һәм ошо кешеләр, европалыларҙы күҙ уңында тотабыҙ, Рәсәй - ҡырағай, тиеп, беҙҙе нисек йәшәргә өйрәтеп маташалар!

Силәбе ҡалаһынан бокс оҫтабикәһе Ирина Русских Рәсәй чемпионатында ҡатнашыр алдынан үлсәнһә, үҙ категорияһының юғарғы сигенән 50 грамм ауырыраҡ икәнлеге асыҡлана. Ҡыҙ аптырап тормай, шундуҡ сәс толомон киҫеп ташлай. Һәм был ҡорбан заяға китмәй - ярыштарҙа «көмөш» миҙал алыуға өлгәшә.

Украинаның Троицкое ауылында бер әҙәм бикле ишекте емереп сиркәүгә ингән. Юҡ, талау өсөн түгел, христиандарҙың ғибәҙәт йолаһын үтәп, шәм тоҡандырыу менән сикләнә. «Иҫәргә доға ҡылырға ҡушһаң, маңлайын ярғансы суҡыныр» тигәндәре шул булалыр инде! Полиция шул тик-лем аптырағандыр, енәйәтсене изоляторға түгел, дауаханаға илтәләр.

Нефтеюганск ҡалаһында 34 йәшлек әҙәм Тобольск ҡалаһында бесәйе үлеүе тураһында ишетә. Һуңғы юлға оҙатыу өсөн ВАЗ автомобилен урлай ҙа, 240 километрлыҡ сәфәргә сыға. Икенсе көнөнә тотола. Транспорт менән идара итергә таныҡлығы ла булмауы асыҡлана. Яҙ һәм көҙ - психиканың бушаған мәле инде ул...

Францияның Мозель һәм Мерт департаменттарында меңәрләгән кеше утһыҙ ҡалды. Баҡһаң, ике ҡауҙы электр бағанына оя ҡоралар. Бер ботаҡты сымдарға төшөрөп «короткое замыкание» барлыҡҡа килә. Ремонт эштәре башланғас та, йорт төҙөүҙәрен дауам итәләр.

«Ихтирам» социаль хеҙмәтләндереү ойошмаһы «Асыҡ ишектәр көнө» сараһына саҡыра. 26 апрелдә 09.00-15.00 сәғәттәрҙә - Учалы ҡалаһы, Ленин урамы, 4-се йорт, 16-сы кабинет. Барыһы ла социаль хеҙмәтләндереү буйынса консультациялар аласаҡ, ойошма менән танышасаҡ.
Үҙәк матбуғатты һәм интернетты файҙаланып, Илфат ЯНБАЕВ әҙерләне.