Йәш ғаиләләргә булышлыҡ итеү буйынса республика программаһы сиктәрендә район хакимиәтендә бер төркөм яҡташтарыбыҙға бала тыуғанда бирелгән социаль түләү таныҡлыҡтары тапшырылды.
Бәхет йылмайған 9 йәш ғаиләгә сертификаттарҙы тантаналы рәүештә район хакимиәте башлығының социаль сәйәсәт буйынса урынбаҫары Зөһрә Гордиенко тапшырҙы. Һәр парға 260-430 мең һум тура килде: беренсе бала тыуған икән - торлаҡтың 8 квадрат метр майҙаны «һыҙып ташлана», икенсегә - 12, өсөнсө сабыйға - 16 квадрат метр. 9 сертификаттың тулайым хаҡы 2 миллион 960 мең һум тәшкил итте - бар аҡса торлаҡ алыу өсөн төҙөлгән кредит һәм ипотека килешеүҙәре буйынса түләүҙәрҙе өлөшләтә ҡаплауға йүнәлтелә.
Учалы районында бала тыуғанда социаль түләү алыу өсөн сиратта 117 ғаилә тора, тип белдерә район хакимиәтенең мәғлүмәт-аналитика бүлеге. Үкенес, был программа бөгөнгө көндә туҡтатылған, ләкин кем сиратҡа тороп өлгөргән, республика бюджетынан маҡсатлы рәүештә тағы ла аҡса килеүенә өмөтләнә алалар.
Беҙҙең хәбәрсе.