Илебеҙ мәктәптәрендә, яңы уҡыу йылына старт биреп, Белем көнө байрамы үтте.

Учалы ауылы башҡорт гимназияһы алды ла был иртәлә балалаларҙың шат ауаздарына күмелде. Һағынышҡан класташтар менән бергә тантаналы линейкаға мәктәп ишеген тәүләп асыусы малайҙар-ҡыҙҙар ҙа йыйылды.
Яңы уҡыу йылында гимназияға тағы 63 бала белем алырға килде. Ҡунаҡтарҙы, ата-әсәләрҙе, уҡытыусыларҙы һәм уҡыусыларҙы, тәү башлап, мәктәп директоры Гизәр Мостафин сәләмләне.